note

കൂട്ടായ്മ

Thursday, December 1, 2011

രചനാമാന്ദ്യം സംതൃപ്തിയും-Rachana






എന്തിനേറെ പറയുന്നു ഇപ്പോള്‍ എന്‍റെ ബ്ലോഗില്‍
എഴുതാന്‍ സമയമില്ല തീരെ!
ഭാവനാചിറകിലേറി മനസ്സും,വപുസ്സും സജ്ജമാക്കി
എഴുതാനുള്ള ആദ്യപടിയായി ഡാഷ്ബോര്‍ഡ്
തുറക്കുമ്പോള്‍ കാണുന്നു.
ഞാന്‍ പിന്തുടരും ബ്ലോഗുകള്‍.
പുതുരചനകള്‍.
ക്ഷണിക്കുന്നു,ഒന്നുകണ്ടു് പോകാന്‍.
അവഗണിക്കരുതല്ലോ!
ക്രമാനുക്രമം തുറക്കുന്നു.
അറിവിന്റെ,അനുഭവത്തിന്റെ പുത്തന്‍ചക്രവാളങ്ങള്‍
കണ്‍മുമ്പിലേയ്ക്ക് തുറന്നുവരുന്നു. ആകര്‍ഷകമായരചനകളും,
വശ്യമനോഹരമായ ചിത്രങ്ങളും,
ആനുകാലിക പ്രസക്തമായ വിഷയങ്ങളെ സംബന്ധിച്ചുള്ള
വിജ്ഞാനപ്രദമായവിവരങ്ങളും, പ്രൌഢമായ ലേഖനങ്ങളും.
എല്ലാം സശ്രദ്ധം വായിച്ച് 'പേസ്റ്റൊ'ട്ടിക്കാതെ തനതായ
ശൈലിയില്‍ അഭിപ്രായങ്ങള്‍ എഴുതാന്‍ ശ്രമിക്കുന്നു.

ഓരോ ബ്ലോഗിലുമായി അഭിപ്രായങ്ങള്‍ രേഖപ്പെടുത്തുമ്പോഴും
മനസ്സില്‍ നിറയുന്നത് ആത്മസംതൃപ്തിയാണ്.
ബ്ലോഗ് നോക്കാനും അഭിപ്രായം രേഖപ്പെടുത്താനും
കഴിഞ്ഞല്ലോ!എന്‍റെ ബ്ലോഗ് ശ്രദ്ധിക്കപ്പെടുന്നില്ലെങ്കിലും.

പിന്നെ 'ലിങ്ക്‌'ശൃംഖലയില്‍ ചാഞ്ചാടി അപരിചിത
വാതായനങ്ങളിലൂടെ പ്രയാണം ആരംഭിക്കുമ്പോള്‍
'വെബ്' വിസ്മയം!വിരല്‍ത്തുമ്പു സ്പര്‍ശത്താല്‍
സമീപം പ്രത്യക്ഷപ്പെടുന്ന അത്ഭുതപ്രപഞ്ചം

അതിനിടയില്‍ സംഭവിക്കുന്ന ഊര്‍ജ്ജതകരാറുകള്‍!
ആവര്‍ത്തന ദിനങ്ങള്‍...........
ആത്മസുഖം നല്‍കുന്ന ദിനങ്ങള്‍..

കടലാസില്‍ അനര്‍ഗളം വരികള്‍ ഒഴുകുമെങ്കിലും,
മറ്റു മാധ്യമങ്ങളില്‍ പ്രസിദ്ധീകരിക്കാന്‍ അവസരം
ലഭിക്കുമെങ്കിലും,ബ്ലോഗിലെ അഭിപ്രായസ്വാതന്ത്ര്യം,
സൌഹാര്‍ദ്ദകൂട്ടായ്മ ലഭ്യമാകുകയില്ലല്ലോ!!!

പ്രവൃത്തി ചെയ്ത സംതൃപ്തി.

"അവനവനാത്മസുഖത്തിനാചരിക്കു-
ന്നവയപരന്നു സുഖത്തിനായ് വരേണം."

ഗുരുവചനത്തിന്റെ ആഴം......!!!!!!!!!!!!



*************************************

Sunday, November 6, 2011

കളഞ്ഞുകിട്ടിയ.......പത്രങ്ങളിലൂടെ(Kalanju.....)






പണാര്‍ത്തിയാണ് ഇന്ന് സമൂഹത്തില്‍ പരക്കെ. പണം
പെരിപ്പിക്കാനുള്ള വ്യഗ്രതയില്‍ വന്‍കിടക്കാരുംഏതു
അഗമ്യമാര്‍ഗമുപയോഗിച്ചും ധര്‍മ്മംവെടിഞ്ഞ് സമ്പാദ്യം
കുന്നുകൂട്ടാനുള്ള തന്ത്രപാടിലാണ്.
ദുരാഗ്രഹിയായ രാജാവിന് ആര്‍ത്തിമാറ്റാന്‍ കൊടുത്ത
വരം ശാപമായി കലാശിച്ച കഥ ഇത്തരുണത്തില്‍
ഓര്‍മയില്‍വരികയാണ്.

ആധുനികജീവിതസുഖലോലുപതയില്‍ നിമിഗ്നരായി
ആയതിനുവേണ്ട 'മെറ്റീരിയല്‍സ് 'സംഘടിപ്പിക്കുന്നതിനായി
അധര്‍മ്മ മാര്‍ഗങ്ങളിലൂടെ ചരിക്കുകയും മനുഷ്യത്വരഹിതമായ,
പൈശാചികമായ ക്രൂരകൃത്യങ്ങള്‍ നിര്‍വഹിച്ചു് വിലസിനടക്കുന്നെന്നു
കേള്‍ക്കുമ്പോള്‍ത്തന്നെ.........................................

അത്തരം സുഖങ്ങള്‍ നൈമിഷികമാണെന്നോര്‍ക്കണം!!!


എന്നാല്‍ സത് മൂല്യങ്ങള്‍ കൈവിടാതെ അതിനനുസൃതമായി
ജീവിക്കുന്നവര്‍ക്ക് ഒരിക്കലും കുറ്റബോധവും,ജീവിതപരാജയവും
ഉണ്ടാവുകയുമില്ല.നിശ്ചയം.നിശ്ചയം.

2011 നവംബര്‍ 6 ഞായറാഴ്ച്ച മാതൃഭൂമിദിനപത്രത്തിലെ
വാര്‍ത്ത ഞാനിവിടെ ചേര്‍ക്കുന്നു.













കളഞ്ഞുകിട്ടിയ പത്തുപവന്‍ ഉടമസ്ഥനെ ഏല്പിച്ചു.

ചിറ്റൂര്‍: ഓട്ടോ യാത്രയ്ക്കിടെ കളഞ്ഞുപോയ 10പവന്‍ സ്വര്‍ണമടങ്ങിയ
ബാഗ് ലോറിഡ്രൈവറുടെ സത്യസന്ധതയില്‍ നാവിക ഉദ്യോഗസ്ഥന് തിരിച്ചുകിട്ടി.

ലോറി ഡ്രൈവര്‍ മാഞ്ചിറ കല്ലത്തുപറമ്പില്‍ വി.മോഹന്‍ദാസാണ് കളഞ്ഞുകിട്ടിയ
സ്വര്‍ണം ഉടമസ്ഥന് തിരിച്ചേല്പിച്ചത്. നാവിക ഉദ്യോഗസ്ഥന്‍ ചിറ്റൂര്‍സ്വദേശി
രാജാമണി കല്യാണാവശ്യത്തിന് സ്വരൂപിച്ച സ്വര്‍ണമടങ്ങിയ ബാഗ് നല്ലേപ്പിള്ളി
യിലേക്കുള്ള ഓട്ടോയാത്രയ്കിടെ മാഞ്ചിറവെച്ച് നഷ്ടമാവുകയായിരുന്നു.

വെള്ളിയാഴ്ച വൈകീട്ട് ഏഴുമണിയോടെയാണ് സംഭവം. ഈ സമയം മാഞ്ചിറയിലെ
വീട്ടിലേക്ക് പോവുകയായിരുന്ന മോഹന്‍ദാസിന്കളഞ്ഞുപോയസ്വര്‍ണമടങ്ങിയ
ബാഗ് ലഭിച്ചു. ബാഗില്‍ തുണികളും 10 പവന്‍ സ്വര്‍ണമടങ്ങിയ ചെറിയ പെട്ടിയും
കണ്ടതോടെ മോഹന്‍ദാസ് ബാഗുമായി ചിറ്റൂര്‍ പോലീസ്‌സ്റ്റേഷനിലെത്തി.
ഈ സമയം രാജാമണി ബാഗും സ്വര്‍ണവും നഷ്ടപ്പെട്ട വിവരം കാണിച്ച് പോലീസില്‍
പരാതിനല്‍കിയശേഷം സ്റ്റേഷനില്‍നിന്ന് ഇറങ്ങുകയായിരുന്നു.

പോലീസിന്റെ സാന്നിധ്യത്തില്‍ മോഹന്‍ദാസ് ബാഗ് രാജാമണിയെ ഏല്പിച്ചു.
ശനിയാഴ്ച പോലീസ്‌സ്റ്റേഷനില്‍ നടന്ന ചടങ്ങില്‍ ബാഗും സ്വര്‍ണവും
തിരിച്ചേല്പിച്ച മോഹന്‍ദാസിനെ ആദരിച്ചു. ചിറ്റൂര്‍പോലീസിന്റെ ഉപഹാരം
എസ്.ഐ. എം.ജെ.ജിജോ, മോഹന്‍ദാസിന് കൈമാറി.

****************************************************

Friday, November 4, 2011

നുറുങ്ങു വെട്ടം-പത്രങ്ങളിലൂടെ(Nurungu vettom)


സംഭ്രമജനകവും, ഹൃദയത്തില്‍ വിക്ഷോഭവും ഉണര്‍ത്തും വിധത്തിലുള്ള
വാര്‍ത്തകളാണ്നാം നിത്യവും പത്രദൃശ്യശ്രവ്യമാധ്യമങ്ങളില്‍ കൂടി വായിച്ചും,
കണ്ടും,കേട്ടുംകൊണ്ടിരിക്കുന്നതു്.

കാലത്തുണര്‍ന്നു പത്രം തുറന്നാല്‍ അക്രമം,
കൊള്ള,കൊലപാതകം,മൃഗീയമായപീഡനങ്ങള്‍ ,ഉന്നതപീഠമേറിയവരുടെ
തരംതാണ ഗീര്‍വാണങ്ങളുടെ അര്‍ത്ഥതലങ്ങള്‍തേടിയുള്ള
വിവരണങ്ങളും മറ്റുമറ്റുമാണ് കാണാന്‍ കഴിയുക കൂടുതലും.
ദൈവത്തിന്റെ സ്വന്തം നാട്ടില്‍ പിശാചിന്റെ, സാത്താന്റെ സന്നിവേശം!
ഓരോരോദിവസവും നടക്കുന്നത് നിഷ്ഠൂരവും,മൃഗീയവുമായ സംഭവങ്ങള്‍ !
മനുഷ്യമനസ്സാക്ഷിയെ ഞെട്ടിപ്പിക്കുന്ന കൃത്യങ്ങള്‍ .ആവര്‍ത്തിക്കുന്നു?
പ്രചോദനവും,ആവേശവും ഉള്‍ക്കൊണ്ടാണോ..?
മൃഗീയവാസന മനുഷ്യനില്‍ പടര്‍ന്നു കയറിയോ?
മൃഗങ്ങള്‍പോലും ചെയ്യാത്തത്!!!!!!!
ഇപ്പോള്‍ കുട്ടികള്‍ക്ക് പത്രങ്ങള്‍ വായിക്കാന്‍ കൊടുക്കുമ്പോള്‍ ആശങ്കയാണ്‌,ഭയമാണ്.
പണ്ടൊക്കെ നിത്യവും പത്രപാരായണം നടത്തണമെന്ന് വിദ്യാര്‍ഥികളോട്
പറയുമായിരുന്നു; അദ്ധ്യാപകരും രക്ഷകര്‍ത്താക്കളും.ഇന്നതിനു് വിദ്യാര്‍ഥികള്‍ക്ക്
പാഠ്യേതര വായനയില്‍ താല്പര്യമില്ല.സമയവുമില്ല.പിന്നെ ദൃശ്യമാധ്യമങ്ങള്‍ ഉണ്ടല്ലോ!
പിന്നെയാണോ മഹാന്മാരുടെ ജീവചരിത്രങ്ങള്‍ വായിച്ചുമനസ്സിലാക്കി അവരുടെ
ജീവിതപാത പിന്തുടരാന്‍ !
വായനയില്‍ നിന്ന് നേടിയ അറിവ് കാലാകാലം നിലനില്‍ക്കും .
ശിലാഫലകത്തില്‍ കൊത്തിവെച്ചപോലെ.
ദൃശ്യമാധ്യമങ്ങളില്‍ കാണുന്നവ അധികംആയുസ്സില്ലാതെ അപ്രത്യക്ഷമാകാനാണ് സാധ്യത.
പത്രങ്ങള്‍ വിദ്യാര്‍ഥികള്‍ക്കായി പലപേരുകളില്‍ പേജുകള്‍ നീക്കിവെച്ചിട്ടുണ്ട്‌.
വിജ്ഞാനസമ്പാദനത്തിനായി, പഠനസഹായിയായി.
നിലവാരമുള്ള എഡിറ്റോറിയലുകളും പ്രയോജനപ്രദമാണ് .
ദൃശ്യമാധ്യമങ്ങളില്‍ പ്രത്യക്ഷപ്പെടുന്ന പരസ്യവൈകൃതങ്ങള്‍ .
ഭാഷയെ മലീമസമാക്കുന്ന വിധത്തില്‍ പദങ്ങള്‍ തിരുകികയറ്റികൊണ്ടുള്ള
ശൈലീപ്രയോഗം. പിഞ്ചിളംചുണ്ടില്‍ സദാ പിറന്നുവീഴാനുതകുന്ന
വെടിമരുന്നിന്റെ മാര്‍ദ്ദവമുള്ള അമിട്ടുകള്‍ !
ആര്‍ഷസംസ്കാരഭൂമിയില്‍ വീണുപ്പൊട്ടുന്ന ആറ്റംബോംബുകളാണ് പരസ്യങ്ങളില്‍ പലതും.
സീരിയല്‍ നീട്ടിക്കൊണ്ടുപോകാനുള്ള കോപ്രായങ്ങള്‍ !

സദ് മൂല്യങ്ങള്‍ നഷ്ടപ്പെടുന്നുവെന്നു കരുതുന്ന ഈ കാലഘട്ടത്തില്‍
ഒരുപുതു പ്രകാശമായി വിളങ്ങുന്ന പ്രഭാകിരണങ്ങള്‍ എന്ത് ആഹ്ലാദമാണ് നല്‍കുക!

2011നവംബര്‍04-വെള്ളിയാഴ്ചയിലെ മലയാളമനോരമ ദിനപത്രത്തിലെ ഈ വാര്‍ത്ത
നിറഞ്ഞമനസ്സോടെ ഇവിടെ പകര്‍ത്തട്ടെ.....

റോഡില്‍ പരിക്കേറ്റു കിടന്നയാളെ
ആശുപത്രിയിലെത്തിക്കാന്‍ ചേര്‍പ്പ് ജി വി എച്ച് എസിലെ
ആഷിത്ത്,റംഷാദ്,ഹക്കീം
എന്നീ വിദ്യാര്‍ഥികള്‍ നടത്തിയ പരിശ്രമം.
വണ്ടിയിടിച്ചയാളെ റോഡരുകില്‍ മാറ്റിക്കിടത്തി മുങ്ങിയ
അതേ തൃശൂരില്‍ നിന്ന്.......




കുട്ടികളില്‍ നിന്നു പഠിക്കാം

സ്വന്തം ലേഖകന്‍
------------------------
തൃശൂര്‍ : റോഡില്‍ പരിക്കേറ്റു കിടന്നയാളെ ആശുപത്രിയിലെത്തിക്കുന്നതിന്
മൂവരും റോഡില്‍നിന്ന് അലമുറയിട്ടു.

പലവാഹനങ്ങള്‍ക്കും കൈകാണിച്ചു.ഒടുവില്‍ യൂണിയന്‍ തൊഴിലാളികളുടെ
സഹായത്തോടെപരിക്കേറ്റയാളെ താങ്ങിയെടുത്ത് ഓട്ടോയില്‍ കയറ്റി ആശുപത്രിയിലെത്തിച്ചു.
കൂര്‍ക്കഞ്ചേരിയില്‍ ആംബുലന്‍സ് ഇടിച്ചുമരിച്ച ബൈക്ക് യാത്രികനെ ആശുപത്രിയിലെത്തിക്കാന്‍
സേവനനിരതരായതു മൂന്നു പ്ലസ് വണ്‍ വിദ്യാര്‍ഥികള്‍ .

ചേര്‍പ്പ്‌ ഗവ.ഹയര്‍ സെക്കന്‍ഡറി സ്കൂളിലെ ആഷിത്ത്,റംഷാദ്,ഹക്കീം എന്നീ
വിദ്യാര്‍ഥികള്‍ കാണിച്ച മാതൃക ഇതാ,ഒരു പാഠപുസ്തകമായി..........

എല്ലാവരും പകച്ചു നില്‍ക്കെ സ്കൂള്‍ യൂണിഫോമിലെത്തിയ ആ മൂന്നു വിദ്യാര്‍ഥികള്‍
സധൈര്യം പരുക്കേറ്റയാളെ താങ്ങിയെടുത്ത് ഓട്ടോയില്‍ കയറ്റുകയും ആശുപത്രിയിലെത്തിക്കുകയായിരുന്നു.

അവിണിശ്ശേരി ചങ്ങല ഗേറ്റിനു സമീപം റോഡില്‍ ചോരയൊലിച്ച് കിടന്ന
തട്ടില്‍ ഇയ്യു പോള്‍സന്റെ മകന്‍ ജോര്‍ജുകുട്ടിയെ ആശുപത്രിയിലെത്തിക്കാനാണ്
സ്ഥലത്തെ മൂന്നു യൂണിയന്‍പ്രവര്‍ത്തകര്‍ക്കൊപ്പം ഈ വിദ്യാര്‍ഥികള്‍ സേവനത്തിനിറങ്ങിയത്.
കൂര്‍ക്കഞ്ചേരി ജെപിഇ സ്കൂളിനു സമീപം നടന്ന അപകടത്തില്‍ പരിക്കേറ്റ ജോര്‍ജുകുട്ടിയെ
അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല
എന്നതില്‍ ദുഃഖിതരാണ് ആഷിത്തും,റംഷാദും,ഹക്കീമും.

ബുധനാഴ്ച വൈകിട്ട് അഞ്ചുമണിയോടെയായിരുന്നു അപകടം.ഇരിഞ്ഞാലക്കുടയില്‍നിന്നു
തൃശൂരിലേക്ക് പോവുകയായിരുന്ന ആംബുലന്‍സ്‌ തൃശൂരില്‍നിന്ന് വീട്ടിലേക്ക് മടങ്ങുകയായിരുന്ന
ജോര്‍ജുകുട്ടിയുടെബൈക്കില്‍ ഇടിക്കുകയായിരുന്നു.ഈ സമയം ചേര്‍പ്പ്‌ ഗവ.എച്ച്‌എസ്എസില്‍ നിന്ന്
ബസില്‍ വടൂക്കരയിലെ വീട്ടിലേക്ക് പോവുകയായിരുന്നു ഈ മൂന്നു വിദ്യാര്‍ഥികള്‍ .
ബസ് ഇറങ്ങേണ്ട സ്ഥലം എത്തിയിരുന്നില്ലെങ്കിലും ഗതാഗതക്കുരുക്കു കണ്ട് ചാടിയിറങ്ങുകയായിരുന്നു മൂവരും.
അപകടം കണ്ടു പലരും പകച്ചുനില്‍ക്കെ സ്ഥലത്തെ യൂണിയന്‍ തൊഴിലാളികള്‍ക്കൊപ്പം
ഈ വിദ്യാര്‍ഥികളും രംഗത്തിറങ്ങി.

വണ്ടികള്‍ പലതും തടഞ്ഞു് ആശുപത്രിയിലെത്തിക്കണമെന്ന് അപേക്ഷിച്ചെങ്കിലും
ആരും തയാറായില്ല.ഒടുവില്‍ യാത്രക്കാരെ കയറ്റിവന്ന ഒരു ഓട്ടോ നിര്‍ത്തുകയും യാത്രക്കാരെ
ഇറക്കി പരിക്കേറ്റയാളെയുമായി ആശുപത്രിയിലേക്കു പായുകയുമായിരുന്നു.
രണ്ടു യൂണിയന്‍ പ്രവര്‍ത്തകര്‍ക്കൊപ്പം ആഷിത്തും ഓട്ടോയില്‍ കയറി ആശുപത്രിയിലേക്ക് പോയി.
റംഷാദും അബ്ദുല്‍ഹക്കീമും,അതിനു പുറകെ ആശുപത്രിയിലേക്കു പുറപ്പെട്ടു.

റോഡില്‍ വച്ചുതന്നെ ജോര്‍ജുകുട്ടിയുടെ മരണം സംഭവിച്ചിരുന്നുവെന്ന്
വിദ്യാര്‍ഥികള്‍ പറയുന്നു.അപകടത്തിന്റെ ഭീകരനിമിഷങ്ങളില്‍ പതറാതെ സേവനം
ചെയ്തെങ്കിലും ആ നിമിഷത്തെക്കുറിച്ച് ഓര്‍ക്കാന്‍ തങ്ങള്‍ ആഗ്രഹിക്കുന്നില്ലെന്ന് ഹക്കീം പറയുന്നു.
അതേസമയം രക്ഷാപ്രവര്‍ത്തനത്തില്‍ സഹായിച്ച ഓട്ടോറിക്ഷക്കാരനും യൂണിയന്‍കാരും
ആരാണെന്നറിയില്ലെങ്കിലും അവര്‍ക്ക്‌ നന്ദി പറയുകയാണ് മൂവര്‍സംഘം.
*********

മെട്രോ മനോരമയിലാണ് ഈ വാര്‍ത്ത പ്രസിദ്ധീകരിച്ചിട്ടുള്ളത്

Monday, September 5, 2011

പത്രം കിട്ടാത്ത ദിവസം(Pathram....)






കാലത്തുണര്‍ന്നപ്പോള്‍ തന്നെ പത്രമാണ്‌ തെരഞ്ഞത്.
പത്രം വരാന്തയില്‍ വീണിട്ടില്ല.ഗേറ്റില്‍ ഉറപ്പിച്ച ബോക്സിലാണ്
മഴയുണ്ടെങ്കില്‍ പത്രക്കാരന്‍ പത്രം നിക്ഷേപിക്കാറ്.
ഞാന്‍ ബോക്സില്‍ പരതി.
ഇല്ല.
പത്രമില്ല
ഒരുദിവസം പത്രം വായിച്ചില്ലെങ്കിലുള്ള അസ്വസ്ഥത!
എന്തോ കൈമോശംവന്ന മാനസികസമ്മര്‍ദം........!
ചെറുപ്പം മുതലുള്ള ശീലമായിപ്പോയി.
ടി.വി.ന്യൂസ്‌ കണ്ടാലും മറ്റു ദൃശ്യശ്രാവ്യമാധ്യമങ്ങളില്‍ നിന്നുള്ള
വാര്‍ത്തകള്‍ കേട്ടാലും വായനയില്‍ നിന്നുകിട്ടുന്ന സംതൃപ്തി ലഭിക്കാറില്ല.
സാങ്കല്പികരൂപഭാവങ്ങള്‍ ശിലാലിഖിതം പോലെ മനോദര്‍പ്പണത്തില്‍
കൊത്തിവെക്കുന്നു.ഓര്‍മ്മകളില്‍.ചിന്തകളില്‍ ...............
വായനകൊണ്ടുള്ള പ്രയോജനം..............
മുടക്കമാണെങ്കില്‍ തലേദിവസത്തെ പത്രത്തില്‍ കുറിപ്പ് കൊടുക്കുമല്ലോ!
സംശയം തീര്‍ക്കാന്‍ ഞാന്‍ വീണ്ടും പഴയ പത്രം എടുത്തു പരിശോധിച്ചു.
ഇല്ല.അതിലൊന്നും സൂചിപ്പിച്ചിട്ടില്ല.
അടുത്തതായി പത്രഏജന്റിനെ വിളിച്ചുചോദിച്ചു:
പത്രവിതരണക്കാര്‍ പണിമുടക്കില്‍.....!
പെട്ടെന്ന് അത്ഭുതത്തോടെ ഞാന്‍ ചോദിച്ചു:ഹര്‍ത്താലായലും,ബന്ദായാലും
മുടക്കംവരാത്ത.....
അപ്പോള്‍ ഫോണിലൂടെ പത്രവിതരണക്കാരുടെ പരാധീനതകള്‍ ഒഴുകിവരികയാണ്.....പുലര്‍ച്ചെ തണുപ്പില്‍ മഴയില്‍........
പരാതികള്‍......പണംപിരിക്കാനുള്ള അലച്ചിലുകള്‍......
കൃത്യസമയത്തുതന്നെ അടച്ചില്ലെങ്കില്‍................
പത്രഉടമകളുടെയും,അധികാരികളുടെയും,അവഗണന......
പാവം വായനക്കാരന്‍ എന്താണ് ചെയ്യേണ്ടത്‌...ഇതിനിടയില്‍...?!!!!!
>>>>>>>>>>>>>>>>>>>>>>>>>>>>>>>>>>>>
ചിത്രങ്ങള്‍:google.com

Sunday, August 28, 2011

ഇടത്താവളം(Edathavalam)

വൈകുന്നേരം 6മണി
ബസ്സില്‍ തിരക്കുള്ള സമയം
പണി കഴിഞ്ഞു വരുന്ന പണിക്കാരുടെ തിരക്ക്.അവര്‍ തിക്കിത്തിരക്കി
ബസ്സില്‍ കയറുന്നു.
അപകടത്തില്‍പ്പെട്ടു പരിക്കേറ്റ സുഹൃത്തിനെ കാണാന്‍ ആശുപത്രിയില്‍
പോയിവരികയായിരുന്നു ഞാന്‍.
വീട്ടില്‍എത്തിചേരാനുള്ള ധൃതിയില്‍ ബസ്സില്‍ വലിഞ്ഞുകയറി.
മക്കളുടെ കുട്ടികള്‍ എന്‍റെ വരവുംകാത്തിരിക്കുകയായിരിക്കും.താമസിച്ചാല്‍
നിരാശയോടെ അവര്‍ ഉറങ്ങിയിരിക്കും.കുഞ്ഞുമനസ്സുകളെ വേദനിപ്പിക്കാതെ
നോക്കണം.ഇത്തിരി കാര്യം മതി അവര്‍ക്ക് ............
ഒടുവില്‍ ബസ്സ് ഞരങ്ങിയും,മൂളിയും പ്രയാണമാരംഭിച്ചു .
സ്റ്റോപ്പില് ഇറങ്ങേണ്ടിയിരുന്ന യാത്രക്കാര്‍ക്ക് ഏറെ ബുദ്ധിമുട്ട്.അടുക്കുടുക്കാക്കി നിറുത്തിവരെ വകഞ്ഞുമാറ്റി വേണം
പുറത്തുകടക്കാന്‍ .
കണ്ടക്ടറും,ക്ലീനറും ട്രിപ്പ് വൈകാതിരിക്കാനുള്ള തത്രപ്പാടില്‍ ....
സ്റ്റോപ്പുകള്‍ തൊട്ടുത്തൊട്ടാണല്ലൊ!
ഇറങ്ങുകയും കയറുകയും ചെയ്യുന്നവര്‍.
എന്നിട്ടും തിരക്കിന്‌ ശമനമൊന്നും വന്നിട്ടില്ല .
"പാമ്പിന്‍കാവ് ;പാമ്പിന്‍കാവ് .."
ക്ലീനര്‍ വിളിച്ചുപറഞ്ഞപ്പോള്‍ ചിരപരിചിതമായഇടത്തിന്റെ പേരുമാറ്റം എന്നെ ആശയകുഴപ്പത്തിലാക്കി.ഈ റൂട്ടില്‍ ഇങ്ങനെയൊരു ബസ്റ്റോപ്പിനെ പറ്റി കേട്ടിട്ടില്ലല്ലോ!പ്രസിദ്ധമായ ഒരുസ്ഥാപനത്തിന്റെപേരായിരുന്നു സ്റ്റോപ്പിന്‌.
ഞാന്‍ കണ്ടു! പുതുബാര്‍?!അലങ്കരിച്ചിരിക്കുന്നു.നാട്ടിനിറുത്തിയിരിക്കുന്ന ഫ്ലാഗുകള്‍!.വര്‍ണ്ണരാജിപൊഴിക്കുന്ന വൈദ്യുതദീപാലങ്കാരപ്രഭ!.
വാസ്തവത്തില്‍ എനിക്ക്‌ ആത്മരോഷമാണുണ്ടായത്.
വാഹനം ഇരമ്പിനിന്നപ്പോള്‍ ശീഘ്രഗതിയില്‍ വഴിനുഴഞ്ഞിറങ്ങുന്നവരുടെയും,കയറുന്നവരുടെയും ആരവം.
തിക്കും,തിരക്കും.ബഹളമയം.
മൂക്കില്‍ അടിച്ചുകയറുന്ന രൂക്ഷഗന്ധം!
അസ്വസ്ഥതയും,തലവേദനയും..........
നാവുകുഴഞ്ഞ സംസാരങ്ങളും,അശ്ലീലപദപ്രയോഗങ്ങളും......
പുതുതായി ബസ്സില്‍ കയറിയ യാത്രക്കാരനും, കണ്ടക്ടറും
തമ്മില്‍ വാക്കുതര്‍ക്കം........
ബസ്‌ചാര്‍ജ്ജ് ചോദിച്ചപ്പോഴാണ് തര്‍ക്കം തുടങ്ങിയത്.
" കാ..ക ഷി ല നാ..ളെക്..."
"ഇത്,ബസാണ്‌.കടംല്ല്യ"
"ന്‍റെ...കയ്യി..ഒണ്ണൂല്യ"
"എറ്ക്കി വിടും"
"ന്നാ... ടോ ത്..ന്‍റെ പവ് ..റ്.."
"കുടിക്കാന്‍ ണ്ടല്ലൊ!"
"ഹ്ദെ ന്‍റെ കാ...ഷൊ..ണ്ട തന്‍..ക് നാളെ..ദ്..രാ..
ഹി ന്നൊക്കെ...അ..അ..ബ് ടെ ശെ..ലാ..യ്....."
തര്‍ക്കം നീളുകയാണ്...................
അതിനിഎവിടെയൊക്കെ??ഏതേതുതലങ്ങളില്‍..???
<><><><><><><><><><>>><<>>><<<>>>>>><<<<>>><>

Wednesday, August 10, 2011

Sree Narayana Gurudevan

 

Posted by Picasa

ശ്രീനാരായണഗുരുവിന്റെ പ്രസംഗം-Sree Narayanaguruvinte...

(കൊല്ലം ടൌണില്‍ പട്ടത്താനത്ത് ശ്രീ.അച്യുതന്‍ മേസ്ത്രിയുടെ പുതുതായിനിര്‍മ്മിച്ച മന്ദിരത്തിന്റെ ഉദ്ഘാടനവേളയില്‍ ഗുരുദേവന്‍
ചെയ്തതാണീപ്രസംഗം.ശ്രീ.ടി.കെ.മാധവന്‍ ഉള്‍പ്പെടെ പലരും അപ്പോള്‍
അവിടെ സന്നിഹിതരായിരുന്നു. ഈ പ്രസംഗം 1916 ജൂലായ് 16ലെ ദേശാഭിമാനിയില്‍പ്രസിദ്ധപ്പെടുത്തി.)

"ഇപ്പോള്‍ കാണുന്ന മനുഷ്യനിര്‍മ്മിതമായ ജാതി വിഭാഗത്തിന്
യാതൊരു അര്‍ത്ഥവുമില്ല. അനര്‍ത്ഥകരമാണ്. ജാതി അത് നശിക്കുകതന്നെ
വേണം. മേല്‍ജാതി എന്നും കീഴ്ജാതി എന്നും ഉള്ള വിചാരം തന്നെ
ഇല്ലാത്തതാണ്. ഈ വിചാരം നമ്മില്‍നിന്നും പോയിട്ട് വളരെക്കാലമായി.
സമുദായസംഗതികള്‍ മതത്തിനോ മതം സമുദായസംഗതികള്‍ക്കോ കീഴടങ്ങിയിരിക്കുന്നത് തെറ്റാണ്. സമുദായസംഗതികള്‍ക്കും മതത്തിനും തമ്മില്‍
ബന്ധമൊന്നും പാടില്ല. മതം മനസ്സിന്‍റെ കാര്യമാണ്. ആരുടെയും മതസ്വാതന്ത്ര്യത്തെ തടയരുത്. പലതരക്കാരായമനുഷ്യരുണ്ടല്ലോ; അവരില്‍
ഓരോരുത്തരുടെയും മനസ്സിന്റെ ഗതിക്കും വളര്‍ച്ചയ്ക്കും അനുസരിച്ച്
ഭിന്നമതങ്ങള്‍ കൂടിയേ തീരു. എല്ലാവര്‍ക്കും സ്വീകാര്യമായ ഒരൊറ്റ മതം
ഉണ്ടാവാന്‍ പ്രയാസമാണ്. എന്‍റെ മതം സത്യം മറ്റുള്ളവതെല്ലാം അസത്യം എന്ന്
ആരും പറയരുത്. സകലമതങ്ങളിലും സത്യമുണ്ട്. അതെല്ലാം സ്ഥാപിച്ചിട്ടുള്ളതും
സദുദ്ദേശ്യത്തോടുകൂടിയാണ്.

ഇപ്പോള്‍ നടപ്പിലിരിക്കുന്ന ഏതെങ്കിലും ഒരു മതവുമായി നമുക്ക്
യാതൊരു പ്രത്യേക ബന്ധവുമില്ല. എല്ലാ മതങ്ങളും നമുക്ക് സമ്മതമാണ്‌.
ഓരോരുത്തരും അവരവര്‍ക്കിഷ്ടമുള്ള മതം ആചരിച്ചാല്‍ മതി. നാം ചില
ക്ഷേത്രങ്ങള്‍ പ്രതിഷ്ഠിച്ചിട്ടുള്ളത് ഹിന്ദുക്കളില്‍ ചിലരുടെ ആഗ്രഹം അനുസരിച്ചാണ്. ഇതുപോലെ ക്രിസ്ത്യാനികള്‍,മുഹമ്മദീയര്‍ മുതലായ മറ്റു
മതക്കാരും ആഗ്രഹിക്കുന്നപക്ഷം അവര്‍ക്കായും വേണ്ടത് ചെയ്യാന്‍ നമുക്ക്
എപ്പോഴും സന്തോഷമാണുള്ളത്. നാം ജാതിമതഭേദങ്ങള്‍ വിട്ടിരിക്കുന്നു എന്നു
പറഞ്ഞതിന് യാതൊരു ജാതിയോടും മതത്തോടും നമുക്ക് പ്രത്യേക മമത ഇല്ലെന്ന്
മാത്രമേ അര്‍ത്ഥമുള്ളൂ."
ശ്രീനാരായണ ഗുരു

Saturday, August 6, 2011

Thursday, July 14, 2011